يا أطباء مصر...الرحمة!

لما ابقي باتعالج بقالي 4 سنين عند 14 دكتور ( عدد غير مجازي) او اكتر باختلافاتهم العمرية و الخبرة و الفلوس...و ف الاخر مميعرفوش مالي هاقول دة طب...مقدرش يوصل...ملومش عليه...لكن اما يبقي الرد اول ما ادخل عليه و من قبل ما اقعد "انتي جاية لي لية؟ انا مش قلت لك ملكيش علاج عندي و الحالة ملهاش تشخيص؟ جاية لية؟ انا معنديش حاجة جديدة اقولها...يالا اتفضلي و امشي و لو عاوزة تشوفي دكتور غيري انتي حرة)

و لما ابقي باصرخ ساعة الا ربع من الوجع في استقبال مستشفي خاص فاخر...و مفيش الا دكتور واحد في المستشفي كلها...كأن الناس مش من حقها تعيا او تموت في الصباح الباكر..و الدكتور انا واثقة انه سامع صريخي من الدور التالت...و مينزلش...و امي تطلع له 3 مرات تناديه...ومتلاقيش في ايده حالة شغلاه مثلا...ويرد عليها بقلبها الموجوع و اعصابها التلفانة من صريخ بنتها "طيب طب نازل نازل"...و اما الصراخ يشتد ويسرح في كل جسمي لدرجة ان رجال الامن يقرروا يغامروا و يكلموا الدكتور المغرور من موبايلاتهم علي حسابهم و يرد "انا مش قلت نازل!" و تقرر ممرضة وعاملات نظافة يغامروا بالتهزيق و يطلعوا ينادوا له وهو كل دة منزلش...

واما المفروض اخد مسكنات قوية بس هما يقولوا لامي لا هانستني 3 ساعات كمان عشان لازم نصرفهم من صيدلية المستشفي..ونعمل بيزننس...مع ان في صيدلية لازقة ف المستشفي والدكتور يقدر يكتبلي روشته يبقي مصرح بها اشتري دوا نازل جدول...بس يقرر انه يستني 3 ساعات من وجعي عشان يعمل بيزنس لصيدلية المستشفي وينفعها...

واما بعد دة كله ميكشفش عدل و يقولي دي زايدة...اقوله انا لسة شايلة الزايدة عندكم من كام شهر...يقولي اةة...تبقي قرحة..

واما الممرضة تستني عليهم نص ساعة علي ما تنزل تصرفه من صيدلية المستشفي علي ما تخلص الشاي بتاعها في حين ان صريخي رغم تعبي لسة قوي و مسمعها...واما تجيبه و تدخل تشمئز قوي و اول نطقها يبقي "علي فكرة انتي صريخك معصبني...مش عارفة اركز في الحقن...في اية؟ انتي متعبتيش كدة في الجراحة..اية يعني اللي ممكن يكون واجعك كدة؟ اسكتي عشان اعملك الدوا..لو مسكتيش مش هاعمله"...في اللحظة دي مش بس مرضي اللي كسرني...لكن كمان الانسانة و ةالثورية اللي جوايا اتكسرو اما ملقتش قوة ارد بها عليها اقولها انا مش بضاعة...انا انسانة بتحس...وانتي مقصرة...لازم تتحاسبي...بس لم اجد قوة كافية و زاد وجع القلب و الاحساس بالظلم و التهميش علي وجع الجسم..

واما بعد دة كلة الصيدلية تمضي امي علي روشتة الادويا مرتين و تحاسبها عليهم مرتين و اما تركز و تسأل ميقدموش اي تبرير و يسيبوها و يمشوا...

و اما ابقي داخلة درجة اولي ممتاز و الغرفة نادرا ما تتمسح

واما موظف الخزنة يقرر ان مفيش فكة يا مدام فحلال عليا باقي الحساب...

واما الدكتور اللي مفروض بيتابع حالتي...يقرر ميجيش يوميها مع انه مفروض بيلف ع العيانين كل يوم في نفس الوقت...و يقفل تليفونه...و انا باصرخ من 7 صباحا حتي 11 مساءا الي ان فقدت الوعي تقريبا و ضغطي بقي 40 علي 50...و كل دة و الدكتور قرر يروح عيادته الخاصة بدل ما يعمل شغله المعروف و يفوت يطمن ع العيانين فيالفترة المسائية!

واما ميجيش تاني يوم في الفترة الصباحية...و يفضل قافل تليفونه عشان لسة في عيادته الخاصة (مع العلم انه بيرد عليه اما بيكون شغال في المستشفي) لحد ما انا و امي نمضي علي اقرار اننا خارجين من المستشفي علي مسؤليتنا الخاصة قبل ما الدكتور اللي مش راضي يجي يصرح لي بخروج...لان اساسا قعودنا في المستشفي اصبح غير مجدي و هي صحراء جرداء!

واما ادخل دلوقتي بابويا علي نفس  المستشفي ...ادخل بيه شايلاه بما بقي لي من قوة..و الدكتور الامتياز الامور بردو ينزل بعد نص ساعة ساعة الا ربع و انا بابا قدامي مبيتحركش ولا عارف يتنفس و حرارته 40

واما يرفضضوا يدخلونا او يكشفوا عليه الا اما ادفع الف و نص.."يا مدام ما انا باقولك...الرعاية complete و غرفة الف و نص تحت الحساب) وميبقاش في اي ماكينات سحب فلوس قريبة...و مع فكرة اني بفضل الله قادرة ادفعهم و دفعتهم لان امي علمتني ان الطب في مصر تجارة و ان اي مصيبة ممكن تحصل دايما شيلي فلوس معاكي بزيادة...محدش عارف! طب لو غيري و معهوش ولا في ماكينات سحب فلوس ولا في جيبه؟

واما دة حال المستشفيات الخاصة...فكيف بالعامة؟

انا مش باطالب الدكتور يكون متعاطف...قادرة اتفهم القدر المناسب من البرود اللي لازم ينزل عليه عشان يتقن شغله دون قلق او تقصير...لكني باطالبه باسط اعماله...انه يتواجد..وانه يكشف قبل ما يشخص...وانه يولي المريض و وجعه ع البيزنس...يعني لو علاج مطول افهم انك تقولي استني اصرفه من مستشفيتك..لكن دة انا الوجع شل حركتي انا و ابويا!

ومع كل دة انا بيسألوني قافلة من الدكاترة لية! و عشان التعميم تعتيم...وعشان قامت ثورة في البلد دي...وعشان في دكاترة لسة بني ادمين...مضطرة عشان مبادئي ارجع اساند اعتصام الاطباء و مطالبه و حقوقهم زي ما باطالبهم بحقوقنا كمرضي لا حول لنا و لا قوة و لا جاة و لا مال اما مرض ربنا قدرهم يشفوه...بس هاساند من غير نفس...او بنفس هما كسروها اما بدؤا يعاملونا علي اننا بضائع!

الله يسامحكم...ويشفينا...ويحرصنا...ولا يحوجنا! 

اي طبيب شاب او كبير وهو يعد علي من يساندون اعتصام الاطباء احب اقوله...انت مش مضطر تبرر...او توضح موقفك..انا مش ضدك انت لو انت طبيب فعلا عارف واجبك زي ما بتدور علي ابسط حقوقك اللي انا لسة مؤمنة بحقك البديهي فيها...متضايقش من اللي كتبته...ولا مني...ولا عليا...بس انت و انتي اللي تقدروا تجيبوا حقوقكم..و تصلحوا المنظومة...ارجوكم اختلفوا!