كبرنا...كبرنا و كبرت المشاكل...بقت مخيفة.
احنا اللي كبرنا و شوفنا فجأة ان العالم مش وردي؟ ولا الدنيا اللي بقت فجأة رديئة؟ المشكلة مبقتش في عروسة انا شبطانة فيها و امي عايزة تعلمني حاجة فعندت عليا و مش راضية تجيبها..ولا بقت المشكلة ان عندي امتحان و مش قادرة اذاكر و اسوء ما قد يحدث اني اشيل مادة ولا اعيد سنة..ولا بقت اني مقموصة من اعز اصحابي..ولا ان بابا كلمني بعصبية! اكبر مشاكل اليوم مبقتش ان الشوارع زحمة..المشاكل كبرت اكبر من معلش بتاعت اصحابك ليك..
كبرت و مبقاش في كلام ولا فضفضة تداوي و لا تريح..مبقتش الطبطبة بتحل او تداوي..يا اخي المشاكل بقت اكبر من حضن امك ليك...عارفه؟ اللي بتدفس فيه دة ينسيك هموم كتير و لو لحظيا..بيطمنك..حتي لو محلش حاجة او غيرها!
الكلام اللي فقد قدسيته في ظل العنف وهوان الناس و الارواح اللي احنا عايشينه و لا اية اللي اتغير؟ لية الطبطبة مبقتش دوا؟ لية بقت كليشية؟ بقت كل حاجة روتين وكلام متوقع؟ رتم الحياة الثابتة اللي مفيهاش جديد يشدك دة بيرعبني!
فجأة بقينا بنخاف اكتر..علي حاجات بتضيع كانت من مسلمات الامور قبل كدة..افتكرنا ان عمرها ما هتضيع او ان حاجات معينة عمرها ما هتحصل عشان لا يمكن تسوء الدنيا كدة..بس حصلت..والحياة استمرت..بس استمرت ازاي؟ وهل استمرارها بالشكل دة هو اللي مخوفنا؟
انا مش متقوقعة و مكتئبة..بس بافكر كتير..عشان خايفة..من اية؟ وانا ايش عرفني! بس مقبوضة! حاجات كتير بتحصل حواليا هزتني..احداث كتير في البلد والحياة هزت ايماني ببعض الافكار والمسلمات..اظهرت ناس كتير علي حقيقتها..في السياسة و والمجتمع..بقالنا سنتين او اكتر واقفين نتفرج علي وشوش عمالة تقع..ويبان تحتها وشوش اقبح...حلو انهم بيقعوا..بس مش عارفة اتعامل مع الوشوش الحقيقية القبيحة ولا اهرب منها ولا الاقي لها بديل.
في حاجات كتير مش لاقية لها اجوبة..بس الشيئ الوحيد الاكيد..اننا كل ما بنكبر بنخاف..كل ما المسؤلية بنزيد..والدنيا و الناس حوالينا تتغير..بنحس اننا اغراب في دنيا جديدة زي طفل بياخد اول خطوة..وكل ما انا شخصيا باكبر..كل ما سخطي علي اهلي اللي باموت فيهم بيكبر..لية ربوني بالطريقة دي؟ لية فهموني ان العالم ليس بهذا القبح؟ كذبوا عليا؟ ولا كانوا بيحموني؟ ولا كانوا عايزين يربوا بني ادم سوي في عالم غير متوازن اصلا!
لية يربونا علي قول الحق وعدم الغش و استحالة كتم الشهادة..واما نيجي نعمل دة يلوموا علينا و يقولوا اننا مش مقدرين خوفهم علينا ويمنعونا ننزل؟ ولا هي الحاجات دي علمتوها لنا عشان نعملها في الفصل مع اصحابنا و مدرسيننا و احنا صغار و اما نكبر لازم نعرف "نمشي جنب الحيط"؟
انا حاسة اني في غربة..انا باتغير و كل اللي حواليا بيتغيروا..لا اصحابي نفس اصحابي ولا انا نفس الانا..انا حتي مبقتش عارفة احضن امي واتدفس زي زمان!
حتي اصحابك اللي كانوا بيتسندوا عليك وقت ضيقتهم مبقتش عارف تحل لهم حاجة و لا تسندهم...احساس مقيت بالعجز..اصل اللي بيتكسر دلوقتي مش ساعات و ازايز برفان و ضوافر...اللي بيتكسر قلوب و احلام كتير...احلام ولا حقوق انسانية بديهية طبيعية اصبحت احلام في مجتمع عنصري و تحت سلطة جشعة باختلاف اشكالها؟ مبقتش عارفة...بس اللي اعرفه ان حتي ملكة انك تقدر تداوي و تطبطب مبقتش عندي...سرقتها مني حاجات كتير و ناس كتير خلو الوحش في الحياة عادي ولازم نتكيف معاه ان مقدناش تغيره..."اكبروا"...هي حجة الضعيف لما ميلاقيش سبب لكل اللي بيحصل لك ينغص عليك حياتك..فينتهي انه مش لاقي حل غير انه يقولك ان النضوج انك تتقبل كل ما يحدث...برؤية مختلفة! يمكن دة صح..يمكن صح الا حد ما...يمكن كله غلط..مين عارف؟ مين في ايده يحدد؟ ولا حد :) ولا حتي انا :)
هي مبادئنا دي كلام شكله حلو في الكتب ولا افكار بنعيش بيها و بنطبقها بجد؟ ولو هي حقيقة و هي الصح..لية لسة بنعاني؟ لية بنحارب عشام منعملش حاجة ضدها..و لية اللي معندهمش نفس المبادئ الاساسية جي حياتهم سهلة؟
بس اصلا حتي لو عوزت اتخلي عن بعض مبادئي مش هارتاح..بقت جزء من تكويني..مش هاعرف اكذب علي نفسي..مش هاصحي في يوم الاقيني عادي بقيت فلول او في اشتباكات وانا منزلش او اكذب او اغش في شغلي او او او...بس ممكن احاول اقلل من احساسي بالذنب والتفكير المبالغ فيه في كل شيئ باعمله؟
اريد الرجوع لموطني الاصلي...مش عايزة افقد هويتي..ولا انتزع من جدوري..بس عايزة اتعلم اتعايش مع واقع اقبح من ما توقعت!
No comments:
Post a Comment