و يبقي السؤال...اين و كيف سنقضي المشهد الحادي عشر؟

الاخوان و العسكر و الفلول...عصور كتير...في وقت قليل..وطويل..بنفس النهج والدم ...والتعريض و الازدواجية...لو كان واحد فيكم اختلف كان نفع او نجح..لكن للاسف كلكم تاجرتم بالشعب..و اتسندتوا علي حوايط مايلة وقعت بكل واحد فيكم في لحظة من اللحظات...لو كل فصيل كان نجح اما اشتغل لوحده..كان نفع نفسه..فاكيد مش هينفعك اما تتحد مع واحد فيهم...مصلحجي.

الخسارة و المكسب حقايق...لو اتقدر لنا نخسر...يا ريت نخسر بشرف..وبدون ما نغير من مبادئ ثابتة..حتي عشان احاسيسنا...احساسك ملكش ملكة عليه...لكن لك ملكة علي احكامك و قراراتك..تعمل اية؟ اضعف الايمان تدرك الحقايق حتي و انت مش قادر تغيرها..زاو توقفها...او تكملها:
25 يناير ثورة شعب عن بكرة ابيه..رابعة مجزرة..الداخلية كائنات سادية بتقمع لكل نظام...الجيش...الجيش و الشعب عمرهم ما كانوا ايد واحدة..الجيش مؤسسة بتستفيد سياسيا و اقتصاديا من اوجاعنا..الاخوان...جماعة مكيافيلية اتسندت ع الحيطة الغلط ووقعت بيهم و عليهم و علينا في الاخر... 

مشهد واحد: عمر سليمان يلقي خطاب التنحي و عينه مرغرغة يا حبة عيني...كلب وفّي بردو..مبارك بيتخلع...الجيش بينزل..."بيحمينا من حرب أهلية...وبينحاز للشعب"...قفا صعايدة كلنا اخدناه مبتسمين هاتفين الجيش و الشعب ايت واحتة...

مشهد اتنين: قناة صوت الشعب مفتوحة لاول مرة في صالة بيتنا...مجلس شعب اللي الشعب انتخب معظمه اخوان بالقصد...و بحسن نية...والاسوء...بامل...علي امل...ان ما يسمون انفسهم او يسموهم البعض اسلاميين (عندهم جزء تالت في الشهادتين عننا مثلا يا كابتن؟)..عشان " أكيد يعرفوا ربنا...داقوا من مرارنا وقت مبارك..اتحبسوا و يقدروا قيمة الحرية و العدل..و مفيش غيرهم نقدر نثق فيه...هتبقي شوكة لكسر نظام مبارك اننا نجيب معارضينه في الحكم..كسر نظام استمر سنين مفيد و ان لم ينجح...البحر بيقلب موجه و بينضف"... 

مشهد 3: مسيرة لمجلس شعبهم..من خيرة شباب الثورة...شيوعيين و اسلاميين و غيرهم...مطالبين الكتاتني و القوة السياسية اللي لسة داخلة الساحة السياسية باخذ السلطة من العساكر...و "احنا مدنيين في بعض"...مقابلة باتهامات: انتم اكيد متأجرين عشان توقعونا في جيشنا...سيبوه يسلمها براحته...جيشنا وطني...مجلس عسكر وطني..يا مشير يا مشير...الف تحية من التحرير...و كالعادة ينتهي المشهد بدم و العتاف الغبي: "الجيييش..و الشعب...ايييت واااحتة"

مشهد 4: جمعة وثيقة السلمي...يهتف قلة ليست قليلة من شباب يتعافي من اثار ضرب ليست قديمة جدا..."يسقط يسقط حكم العسكر"...لتواجه هتافاتهم اصوات مكبرات صوت عالية الجودة...متكلفة.. بتذيع اغاني وتنية..و ترمز لاتحاد مجلس عسكر و الشعب...و الغالب...كانت بتستخدم قرأن ربنا عشان تشوش علي هتافات عبيد ربنا...و ينتهي المشهد في تمام الساعة الخامسة عصرا...عشان "احنا ثائررين و عاوزين تسليم السلطة زيكم...و بنثبت في الميدان و مبنسيبكوش وقت الضرب...ولا بنضرب فيكم معاهم..بس الجماعة حرجت عليا افضل في الشارع لبعد 5...نمسكها من النص...اسمي نزلت...و اسمي مستنيتش"...و كعادة المشهد ينتهي بهتافه الاوحد: "الجيش...والشعب...اييييت واحتة"

مشهد 5: مذيعة لزجة...خارجة ع المواتنين الشورافاء...تهددهم من "الارهاب" (بردك) ...ضد قوات الجيش و الشرطة...تستنجد بالناس العزل المواطنين...اللي لهم حق الحكاية علي جيشهم..ان يسرعوا الي الشوارع...لقتل المسيحيين الوحشين..العزّل اللي بقدرة قادر..بيقتولوا في قوات جيش و شرطة نظامية..مدربة..و بيدبحوا فيهم بس معندناش جثة واحدة..فيهرع المواتنين الي الشارع...بادئين ما كاد ان يكون حربا أهلية حقيقية..و ينتهي المشهد...ب 27 خشبة...ب 27 عريس...بيتزفوا من الكتدرائية...منهم خشبة شاب نعرفه...طلب من دنيته طلب وحيد...لاخرته...يتزف للتحرير وقت موته...او بالأصح قتله...ليواجه زفته حفنة من مواتنين الدولة الشورافاء...مستخسرين فيه حتي لحظة خروجه من البلد والدنيا و سايابانه لهم..مخضرة..بيزألوه بالطوب..وكالعادة..ينتهي المشهد ب ؟ "الجييييش...والشعب...ايت واحتة!"

فاصل:

جبروت عسكري...و تعريض و ازدواج و بيع و ثفقات دم اخوانية عسكرية حزبية برلمانية بتفشل...بسبب شاشات كتير..عسكر كاذبون...ريم ماجد...يسري فودة..باسم يوسف...مع دم بيكتر...ومشارح مبتعرفش تكدب..ولا تخفي حقايق...و تدريجي..خف الهتاف...وزاد الاستيعاب..ان الجيش و الشعب مش ايد واحدة! لكل جبروت نهاية...وبداية لجبروت اوسخ.

مشهد 6: "هي لله...هي لله...لا لمرسي ولا لجاة"...بترج ميدان التحرير..و في نص شارع متحني بدم شبابه...وقف واد مجدع...اصغر من معظم اللي بيقرا المشاهد...هاتفا لمرسي...موضحا: "انا مش مع مرسي...بس انا اضطريت اكون معاه اما حسيت انهم بيتأمروا ضده...و شفيق مينفعش يحكم...لا للعسكر...و ان شاء الله مرسي يحقق املنا"

مشهد 7: جيكا مرمي ع الارض برصاص مرسي...تحت ولايته...و كلكم راع..و كلكم مسؤول..

مشهد 8: اعتصام سلمي صميم..متكسرش فيه كوباية...تقرر جماعة من الاطفال المدللين...حشد شعوب المحافظات الاخري لتواجه من تبقي من ثوار القاهرة و تستفرض بيهم في مكان اعتصامهم..و بعد ما كان ضرب المظاهرات...بين قوات امن و متظاهرين (مشهد مألوف...سلو بلدنا)...و اضافة لعلاقة الشعب و الشرطة المتوترة...وعلاقة الشعب و الجيش المتوترة...اضفنا علاقة الشعب بالشعب المتوترة.

..انتم اللي قلبتم الأية..استحملوا قرفها دلوقتي! 

مشهد 9: قوة عسكرية..متخفية في كام مدني...قفا متخفي...بتزيح رئيس غير شرعي (الدم افقده شرعيته زيه زي اللي قبله و بعده)...لكنهم ايضا غير شرعيين..و يتجمع جمع اكبر...بس مش اصدق من جمع 3 سنين فاتوا بدؤا الحكاية..و بيرجع الهتاف المعتاد...بس زاد حتة: الجييييش...والشعب....و الشووووورطة...ايت واحتة!

مشهد 10: المجزرة الأكبر...و سمي الاشياء باسمائها...عندما تري المجزرة...فسمها مجزرة...حتي و ان وافقت عليها كالجحش...لكنها تظل علي ما هي عليه: مجزرة! يستشهد من يستشهد...ويهرب الجبان من يهرب...و كالعادة..و عشان الجنة مبتلمش...نقت انقي و اصفي من فينا...كأنها عارفة احنا محتاجين مين معانا فبتاخده مننا كعقاب و تعجيز...و اصطفت الجنة رفقائها...و سابت للدنيا من يستاهلو يكملوا فيها..

الإخوان ليسوا اقل جرما من مجلس عسكر...متلومش ع السيسي لمجازره...و تقولي مرسي غير مسؤول عن دم اللي وقعوا..هو مش لو تعثرت بغلة في الشام لسئل عنها عمر؟ ولا دي مقولة موسيمية؟

"ما احنا في ناس كمان وقعت مننا في الاتحادية"...بيقولوا

بنفس المنطق هأرد عليك...و في ضباط اصيبت و ماتت اثناء فض اعتصامات عصر مجلس عسكر...هل دة يدي مجلس عسكر شرعيته؟

"دة انقلاب"..

اة...مش دي المشكلة...مدركين...بس انت اللي لازم تدرك ان شعبك وصل لمرحلة تقبل حتي انقلاب عسكري لو فيها "خلاصه"...وانك زيك زي الجيش...تعاملت كدولة جوا دولة...لك لغتك الخاصة في التهديد و الوعيد..."الحق يحشد اجناده"...و زيه جبت نسايبك في اماكن مفروض يكون فيها اهل الخبرة مش اهل المدام...ومشيت بنفس النظام..بس الاوسخ..اننا توقعنا منك الاحسن..

مبارك علي يده دم..طنطاوي علي يده دم...مرسي و شباب جماعته علي يدهم دم...و سيسي علي يده دم...شوف الكلمة المقررة في كل الجمل دي و هتطلع بالنتيجة اللي وصلنا لها من كل العصور..

"دول ارهابيين بيقطعوا الطريق"...

مكنش فعل ثوري و انت بتعمله في 2012 ضد العسكر و في 2013 ضد مرسي؟

"دول اشتروا الاعلام لحسابهم"

علي اساس ان قنوات الدين مكنتش بتطبل لمرسي؟

"انتم ازاي تقبلوا بعسكر تاني...دول بيحاكموكم عسكري"

و انت عملت اية في 2012 في عز المحاكمات العسكرية و كانت في ايدك سلطة تشريعية و لك حكم ع التنفيذية تمنعهم..هذه بضاعتكم...ردت اليكم...شيل من ايدك قلادات طنطاوي...وخد بضاعتك..

هل تستمد الشرعية من الصناديق فقط؟ ام من الميادين ايضا؟ اوليست "الشرعية من الميدان"؟ اديتك صوتي في صندوق...فانت شيعت ابني في صندوق...قمت رجعت انا سحبت صوتي في ميدان...لية صعبة الفهم علي كل حاكم؟ 

اين شرعية جيكا و غيره في ان يكملوا عامهم ال17 و يعيشوا حياة طبيعية مملة؟ 

اين شرعية حبيبة عبد العزيز في مواصلة مشوارها الصحفي؟

لية دم احمد عاصم اقل من دم الحسيني؟

كان الحسيني هيزعل و يعزي في احمد عاصم لو كان عاش؟

يا تري احمد عاصم كان من المؤيدين للهجوم علي الحسيني يوم ما اتقتل؟ زعل عليه؟ ام حشد معهم الاجناد؟

احنا بنعيش نفس الصور...بالحرف و الكلمة و الدم..بس الكراسي متبدلة..

"افرم يا سيسي" = "افرم يا مرسي" 

المشكلة مش في كم الاختلافات بينكم و الاختلافات في تياراتكم...المشكلة في مدي تشابه عهركم و تبريركم و ازدواجيتكم...

مش هاختم المشهد ب "يسقط كل من خان...عسكر فلول و اخوان" " عشان اثبتلك اني غير منتفعة...صدق اللي تشوفه..

و يبقي السؤال...اين و كيف سنقضي المشهد الحادي عشر؟