الي أطفالي العمالقة : سلام.

واحد عزيز عليا...في مقام الاخ الكبير اللي ربنا مرزقنيش بيه..مرة قالي "بقي في واحدة عندها ٢٣ سنة... و نص أصحابها بيقولوا لها يا ماما؟"

أة. نص أصدقائي - إخواتي - بيقولولي يا ماما.. أصلي "متبنياهم"...فرق السن بينا يمكن يكون ٣-٤-٢ سنين..مش اصغر مني بكتير..بس بأحسهم أطفالي فعلا...دة مش تقليلا منهم...هما رجالة...بالمعني الانساني و الحرفي و الذكوري...مش ندمانة اني باستخدم وصف يمكن يكون عنصري في نظري "رجالة" و انا باحكي عنهم...لانهم تعريف اصيل للنخوة و الجدعنة...المفهوم اللي اتربينا عليه...و لو كان مغلوط او عنصري بعض الشيئ...بس هو اللي بيوصف حاليا..فهاستخدمه باريحية..

٢٠١١ :المقابلة : إعتصام جامعة القاهرة ضد لايحة حكم العسكر...وضد طلاب الاخوان المسلمين...اللي كذبوا علينا و دخلوا الانتخابات من ورانا عشان يكسبوا الاتحاد...ومباركين ان لايحة امن الدولة...اللي كان النظام بيستبيحهم بيها سابقا..بس دلوقتي هما اللي في النظام.

عرفت في الاعتصام دة شباب وبنات...تعريف رسمي للورد المفتح..الورد ابو شوكة في حلق الديابة..الورد الحنين اللي يداوي..الورد اللي متساقاش بس معافر يعيش..
عرفت في الاعتصام دة واحد زي حسن الندل شاهين...و ناس زي اللي هاحكي عنهم..

شلة الاعتصام بقت بردو شلة محمد محمود و العباسية و كل اشتباك و كل معركة حق...قودناها لوحدنا...بطولنا...ضد الدقون و البيادات و الميكروفونات و الشاشات و مجالس الشعب والقنابل و المطاطي..
كنا بنرمي بنفسنا قدام مدرعات بينا و بينهم متر و نص عشان ننتشل بعض من قدامهم..
طب ازاي تصبح صحبتنا عادية و احنا شوفنا كل حاجة سوا؟ ثورة ..مبدأ...موت...حياة...نجاح...فشل...وجع...وفرح وخناقات 

عبد الرحمن فؤاد (بوشكاش)...الولد ابو قلب طيب...و لطيبة قلبه دايما مسامح و بشوش...يمكن حتي اللي بيحبوه بما فيهم انا استغلوا طيبة قلبه كتير..دايما بيشوف مين فينا كلنا عاوز يعمل اية...و بيعمله...بنفس راضية ومسامحة و بفرحة..
الراجل الجدع 

اللي هو و الشلة ببناتها وولادها كانو بيجوا يقضوا يومهم في المستشفيات معايا..و يستحملوا صريخي وانا عيانة و و ميملوش..و لا يجزعوا..بدل ما كانوا يروحوا يقضوا وقتهم لعب و فسح...كانوا بيقضوه معايا في وجع مش واجب عليهم يشيلوه...كان و كانوا بيجولي الساعة ٢ صباحا يودوا بابا المستشفي معايا..ومن غير ما اطلب..

عبد الرحمن أسامة: الولد المجدع...دايما هتلاقيه في ضهرك..عشان الحق...حتي ان مكانش يعرفك..تربية بيت طيب...علموه يعني اية أصول و جدعنة

أبراهيم الشعار: الشجاع..المستبيع...وبيلبسنا في حاجات كتير من كتر ما مش بيقدر يكتم رأيه...اللي يقول كلمة حق...ولو حد السيف علي رقابته..

٢٠١٤:     ٣ سنين بعد فض الاعتصام...و في وسط معمعة سياسية خلت كل الورد المفتح غمض...عشان نظره خدع...والصورة مبقيتش واضحة من كتر ظلم كل الاطراف..

فجأة موبايلي رن كتير...الاخبار من اول اليوم مش ولابد..اليوم صعب...وختم بخبر القبض العشوائي علي ٣ من اولادي...اة: أولادي!

في ثانية و دون ترتيب...اتجمعت الشلة...شلة القبة...شلة الاشتباكات...اللي الدنيا بتاخدها و توديها..بس وقت اللزوم...بيظهروا و لو بعد حين..

بوشكاش و أسامة نبيل و عبد الرحمن أسامة و ابراهيم الشعار و عمر ساهر كانوا في الجامعة في نفس الوقت لاسباب مختلفة...في حتت متفرقة.

بوشكاش سمع ان أسامة في الجامعة...وقت حدوث الاشتباكات...نزل يجري عشان يجيبه..وهو داخل...شاف بنات بتتهان من عساكر...نخوته سبقته..حاول يوقف دة..

أسامة لمح العسكري و هو ناول فيه ضرب...جري عليه...قال للعسكري "دة ملوش دعوة...خدني انا...انا اللي جريت ع العسكري..دة ملوش دعوة بحاجة.." لحد ما عشكري تاني انهال علي أسامة ضرب..كومه...

خطفوا بوشكاش في مدرعة و جريوا بيه...و أسامة فضل مرمي ع الارض باصابته..وبعدها اختفي وتليفونه اتقفل.

في نفس الوقت: عبد الرحمن أسامة و شعار كانوا في المترو...بعيد تماما عن مكان الاحداث...و تم القبض عليهم هما و ٧ شباب كمان...فيهم اللي اتقبض عليه من محطة العتبة!

اترحلوا كلهم ع مديرية امن الجيزة..

وقت مرار علي ما قدرنا نوصل هما فين...١٠٠ تليفون..١٠٠ خناقة..و حيرة و تدوير و دعا...دعا كتير اوي...

الشلة إتجمعت تاني:

المرة دي ...قدام النيابة...اول ما دخلت...لقيت شباب فيهم مشوفتهومش من سنتين - ٣ ...الا في اشتباكات و ثورة بعد فض اعتصامنا...مرمين ع الرصيف...أهالي مذعورة...بتشحت حق شوفة عيالها...ولا كأنها بتتسولهم بعد ما قضوا حياتهم تعبانين فيهم.

مبيقيناش عارفين...نقوي نفسنا و نطبطب علي بعض...ولا نجز علي اسنانا و نطبطب علي اهاليهم؟

مين حولنا من ابناء اهاليها بتاخد بالهم منهم...الي اباء بتطبطب علي اباء؟

و استنينا..واستنينا..و النيابة و العساكر تلعب باعصابنا...١٠٠ مليون قرار مختلف نوضب روحنا علي اساسه و يطلع فشنك...استنزاف!

نزلوا الشباب علي عربية الترحيلات متأخر..مكناش عاوزينهم يترحلوا..من غلبنا و قلة حيليتنا...هتفنا...هتافنا وقفهم علي رجل..مع انه صوت..فقط صوت!

دربكة و لخبطة..خافوا ينقلوهم...رجعوهم علي حجز النيابة و قالوا هيباتوا فيه...و سجدوا الاهالي ان عيالهم هنا في الجيزة جنبهم..عشان يروحوا...

اسامة مقدرش يتمالك اعصابه اما عسكري شتمه وضرب ام معتقل...رزع بايديه الاتنين علي صدر العسكري بغل...و نزل ضرب و خبط في انهيار عصبي علي كبوتات العربيات..لحد ما لواء شرطة جه كتم صوته و بعده عن عربية الترحيلات...والشباب شدوا اسامة من ايده و بعدوا...وسكت المشهد...بس اسامة مسكتش...فضل يطلع غيظه علي عربيات ناس منعرفهاش و مظلمتناش..

و اول ما روحوا الاهالي ...نقلوا الشباب علي قسم الجيزة تاني...جرينا وراهم...اتفرقنا حبة عند النيابة...فيهم اللي قاعد ع الرصيف يذاكر عشان امتحانه تاني يوم و مش هاين عليه يمشي و يسيب رفاقته...وفيهم اللي النوم غلبه و نام في البرد...و كلهم...محطوش لقمة في بوقهم من صباحية ربنا..

نقولوا الشباب علي معسكر الامن المركزي في الكيلو ١٠ و نص علي طريق مصر- اسكندرية الصحراوي..

جبنا لهم هدوم و اكل،،،وروحنا امهاتهم و هديناهم...والنار قامت في قلوبنا احنا...
يا تري اتضربوا تاني؟

يا تري سيبوا عليهم المسجلين؟

بردانين؟

طب احنا هننام ازاي و هما كدة؟ منمناش.

اللي راح امتحانه مكتبش كلمة...و اللي مرحش اصلا. حياة مؤجلة منذ اكتر من  ٣ سنين..

كان مقبوض علي اكتر من ٤٢ شاب..معظمهم لم يكن علي علاقة بالاشتباكات اصلا! ١١ منهم تم ضربهم ضرب مبرح...لدرجو استدعت نقلهم الي مستفيات القصر العيني و العجوزة..والباقي اترحل ع المعسكر

و سرقوا كمان ١٥ يوم من حياة الشباب علي ذمة جريمة مرتكبوهاش

وجهت اليهم تهم هي الاتية: 

" قتل واحد (طالب تجارة انجليش اللي استشهد في الاشتباكات) ..والشروع في قتل 27

التظاهر

تخريب منشأت عامة 

حيازة سﻻح ناري ..

انضمام لجماعات إرهابية

و الشروع في قتل محمد جابر جاد نصار ابن رئيس الجامعة ..

الا انتم سيبتو كل المصابين و ركزتوا مع ابن جابر نصار؟ ابن الوزة العايمة؟

و في احراز اتلفقت لهم من القسم...مولوتوف .. جراكن بنزين .. مسامير

رحنا الجامعة و حاولنا نجيب اي قيد لاثبات وجود ال٣ شباب في مسرح الجامعة و امتحاناتهم لاثبات انهم ملهمش علاقة بالاشتباكات...ودة حقيقي...لا هم مع دول و لا مع دوكهم!

صورنالهم جداول امتحاناته و اشترينالهم الملازم..

وكتبنالهم جوابات...والشنا عليهم فيها..وردوا بجوابات..و قالولنا انهم جدعان و مش خايفيين...و انهم عاوزين يستحموا و شعار عاوز مكرونة بشاميل :D 
يوم 4-2-2014 كان مفروض يطلع قرار النيابة...نشفوا ريقنا و ف الاخر النيابة هي اللي راحت لهم المعسكر بدل ما يترحلوا هما للنيابة...و اتجددلهم كمان 15 يوم!
يوم الثلاثاء الموافق 25 فبراير اتجددلهم 15 يوم لرابع مرة! و استئنفنا غلي قرار النيابة و اما نشوف!
يوم الجمعة الموافق 28-2-2014 

معتقلي جامعة القاهرة اترحلوا النهاردة الصبح من معسكر الامن المركزي بالكيلو 10 ونص لسجن ﻭﺍﺩﻱ ﺍﻟﻨﻄﺮﻭﻥ.. احنا قدمنا استئناف علي قرار النيابة بالتجديد..والمفروض الطلاب يتعرضوا ع النيابة تاني السبت او الاحد لاخذ قرار فاصل

يا بوشكاش...اسامة وانا و كل الشباب لسة بيكلموك ع الواتس اب و بيرغوا معاك وانت مش بترد...

يا بوشكاش..اسامة اللي مش محتاج يحلفلي ...جه يقسم لي انه مساباكش و فضل يقولهم خدوني معاه لحد ما خطفوك وضربوه..مع اني واثقة انه عمل دة من غير ما يحكيلي..دة وجعني..

يا بوشكاش..الولاد وشوشهم مطفية...شفتهم بيبكوا ساعات كاملة متواصلة..حاسين بعجز..خايفين عليك...وحشتهم!

يا بوشكاش...امك في عنينا!

يا بوشكاش..انت جدع و هتستحمل...انا عارفة..واثقة..

يا بوشكاش...يبتلي المرء علي قدر ايمانه

يا بوشكاش...كانت الدنيا بتضيف بيا بتيجي بكل ذرة طيبة في وشك تهونها..

يا بوشكاش..إطلع بقي يا عم..اطلع اخدك انت و الواد عمر و عبد الرحمن اسامة و اسامة و اوكا و نتمشي ع الكوبري و تغنوا شعبي بعلو الحس و تفضحوني و اسبق لقدام و اسيبكم..اطلع بقي 

يا بوشكاش...إصحابك تعريف الامان و الثقة..

يا بوشكاش...احنا واخدين بالنا من بعض...و مش سايبين بعض ولا هنسيبكم...اياك تقلق :)

يا بوشكاش...اصحابك جدعان
يا بوشكاش...فات اول يوم...هانت!

يا شعب راضي و مطاطي و مهاود..

هو احنا...كبني ادمين في اوائل العشرينيات...في امل نقضي ايامنا في نوادي؟ خروجات؟ نحضر مسرحية؟ حفلة؟ نحب؟ نتقدم في اشغالنا؟ بدون ما تلاتة ارباع طاقتنا و صبرنا و جهدنا يروحوا ع المستشفيات و الاقسام والنيابات والوقفات التضامنية مع اللي اتقبض عليهم في وقفة تضامنية مع اللي اتحبسوا بعد مظاهرة تضامنية؟
ممكن نجري ورا اكل عيشنا مش ورا عربيات الترحيلات؟
ممكن نصرف فلوسنا ع الفسح مش ع الاعاشات والعلاجات؟
ممكن نتلم نضحك مش نواسي بعض في عزا حد فينا؟
ممكن نبقي في امان حتي و احنا واخدين جنب من كل المعارك عشان مش معاركنا؟
ممكن نعيش يومنا بطريقة عادية...مملة جدا؟ ننزل الجامعة مثلا...ونرجع؟
نشوف ماتش و نرجع؟
ناخد مواصلة ونرجع؟
نروح القهوة..ونرجع؟
ننام بنفكر في جديد حلو مش باحساس مقيت بالذنب اننا علي سرايرنا و احبابنا ع البورشات وسراير مرضي تمرض اكتر؟
دة سؤال..حقيقي..
لية؟ طب نوقفه ازاي؟
طب و لو معشناش دلوقتي...هنلحق نعيش امتي؟

مستنين اية بعد ما ايدهم طالت عيالكم عشان تصدقوا و تقتنعوا؟

يا ظالم.. بردو هنفرح و هنتلم ونضحك حتي لو قدام نيابات ومشارح وسجون  و هيطلعوا.

يا سلطة..صحبتنا اقوي من مليون عسكري بسلاحهم الخايف!

يا شباب...احنا اقوياء...ان كنا موجوعين او انتم وحشنا..علي قد وجعها...علي قد اصرارنا انكم تخرجوا وسطينا تاني..مش هنسيبكم...ودة وعد...منقدرش نكسره و ان شئنا!

يا شباب...هنتلم و هنضحك...وهنتريق علي كل اللي حصلكم في سجونهم :)

يا شلة القبة..يا شلة الثورة...تبّت يدا من ساب رفاق المعركة بطولهم..

يا رب..كانت الواحد الدنيا بتضيق بيه يجري عليهم...ادينا محبوسين في همومنا و هما محابيس في سجون الجبابرة!

 يا رب...مصر بتاكل عيالها اللي طعمهم حلو..

يا رب...داوي قلوبنا...و قوينا ع الديابة..و اجعل صحبتنا سند!

يمكن باعاملكم علي انكم "اطفالي" و انا "ماما"...يمكن بتنادوني ماما...لكنكم أطفال في قلوبكم...عمالقة بافعالكم و مبادئكم وثباتكم...علمتوني كتير..و سندتوني اكتر..و الحقيقة اننا احنا اللي محتاجين خروجكم..

قوينا ع الديابة يا رب..